დამსაქმებელთა შეხვედრა ვეტერანებთან

2017 წლის 1-ელ მარტს თბილისის სახელმწიფო სამედიცინო უნივერსიტეტის სააქტო დარბაზში ვეტერანების საქმეთა სახელმწიფო სამსახურის ორგანიზებით უწყების ბენეფიციართათვის გაიმართა საქართველოში მოქმედი ბიზნესის მხარდამჭერი სახელმწიფო პროგრამებისა და საინფორმაციო-საკონსულტაციო მომსახურების პრეზენტაცია, რომელშიც მონაწილეობა მიიღო საქართველოს დამსაქმებელთა ასოციაციამ.

შეხვედრაზე სიტყვით გამოვიდა დამსაქმებელთა ასოციაციის ვიცე-პრეზიდენტი დანიელ გახარია, როლმაც გააკეთა მოხსენება ბიზნეს პროგრამებსა და პროექტებში ვეტერანების პრაქტიკული ჩართულობის შესახებ. აღნიშნული საკითხის ირგვლივ გამართული მსჯელობის ფარგლებში დამსაქმებელთა ასოციაციის ვიცე-პრეზიდენტმა პასუხები გასცა დამსწრე საზოგადოებისთვის საინტერესო შეკითხვებს.

მოწვეულ სტუმართა შორის იყვნენ სახელმწიფო და ბიზნეს სექტორის წარმომადგენლები, მათ შორის: ეკონომიკისა და მდგრადი განვითარების სამინისტრო სსიპ „მეწარმეობის ხელშეწყობის სააგენტო“ - პროგრამა - “აწარმოე საქართველოში“, სოფლის მეურნეობის სამინისტროს სოფლის მეურნეობის პროექტების მართვის სააგენტო - პროგრამა „დანერგე მომავალი“, სასოფლო-სამეურნეო კოოპერატივების განვითარების სააგენტო, საპარტნიორო ფონდი, ინოვაციური ბიზნესის ხელშეწყობის პროგრამა - „სტარტაპ საქართველო“ და საქართველოს დამსაქმებელთა ასოციაცია.